Matematicas

As Matematicas (d'o griego μάθημα, máthema: ciencia, conoiximiento, aprendizache, μαθηματικóς, mathematikós: amant d'o conoiximiento) son una Ciencia que se definen como l'estudio d'os patrons de cantidat, estructura, cambeo y espacio. Dende un punto d'anvista formalista, ye la investigación d'estructuras abstractas en emplegando la lochica formal como ferramienta de treballo. As Matematicas pueden considerar-se como una ixampladura d'os luengaches parlaus y escritos, con un vocabulario y una gramatica estremadament precisos, ta describir y estudiar as relacions fisicas y conceptuals. Encara que las Matematicas no se consideran, por un regular, como una Ciencia natural, as estructuras especificas investigadas por os matematicos tienen a sobén o suyo orichen en as Ciencias naturals, mas que mas en a Fisica. Manimenos, a mas gran parti d'as estructuras son purament internas a las Matematicas (porque permiten una cheneralización d'atras subarias, u bella ferramienta ta calculos comuns). Finalment, bels atros matematicos estudian as suyas arias por razons esteticas, veyendo-las mas como una mena d'arte que no como una Ciencia aplicada.